На главную

ПОИСК

 

111
Новости
Аналитика
Комментарии и интервью
Пресс-релизы
Афиша
Мероприятия РНКАТНО
Фоторепортаж

Татарская община
О РНКАТНО
Праздники и традиции
Национальная кухня
Татарские имена
Культура
Из истории
Выдающиеся татары
Ветераны
Наша молодежь
Татарские села области
Уроки татарского


Газета <Мишар доньясы>
Приложение <Миллят>

Библиотека
Энциклопедия

Благотворительность

Служба знакомств
Форум
Чат
Обратная связь
Карта сайта
Наши баннеры
О проекте

Другие национальные
объединения области
 
:: Мищар 20. Маҗаралар җитәрлек булды

Маҗаралар җитәрлек булды


Маҗаралар җитәрлек булды

    Нижгар мөселманнарының Диния нәзарәте каршында уңышлы эшләп килүче Хәйрия бүлеге гамәлләре турында гел язып торабыз. 1 июньдә билгеләп үтелә торган Балаларны яклау көнендә бу бүлек җитәкчесе Зөһрә ханым Идрисова ел саен ятим балалар өчен ни булса да оештыра: я теплоходта ял, я курчак театрында спектакль, я зоопаркка алып барып, балаларга бәйрәм ясый. Гадәттә бу көнне аларга бик матур тәмле-татлы табын да корыла, күпсанлы бүләкләр дә тапшырыла. Ә быел инде Салган балалар йортыннан 20 бала һәм Кнәген районыннан гаиләләргә тәрбиягә алынган 20 ятим бала өчен Кстово районында табигать кочагында урнашкан «Экстрим-ленд» маҗаралар паркында ял оештырылды. Иртән килеп төшү белән балаларны яхшы гына ашаткач, аларны ике төркемгә бүлеп, инструкторлар төрле уеннар оештырдылар. Спорт велосипедларында, төрле гаҗәеп мотоциклларда, җигүле атларда да рәхәтләнеп йөрделәр. Олырак балаларга атларга атланып йөрергә дә мөмкин булды. И рәхәтләнде инде авыл балалары! Ул батутларда сикерү дисеңме, киноларда гына күргәнчә текә кыяларга үрмәләп менүме – берсе дә калмады! Әле ике командага бүленеп, шлемнар киеп, йомшак резин таяклар белән дә сугышып карадылар. «Күңелле старт» уены да ошады балаларга. Бер көн эчендә берничә айга җитәрлек хис-тойгылар җыйды алар. Гел елмаерга торган авызларын да җыя алмый, дәртләнеп кычкырдылар, рәхәтләнеп көлделәр – чын-чынлап ял иттеләр балалар! Игътибар һәркемгә күңелле, ә инде ата-ана назыннан, гаилә җылысыннан мәхрүм балалар өчен бигрәк тә зур әһәмияткә ия мондый чаралар! Салган балалар йортыннан бер малаебызны атларны караучы парк хезмәткәре бик ошатып, аңа аерым игътибар күрсәтеп, чыбыркысын биреп, гел янында йөретте. Күрсәгез иде ул баланың горурлыгын, аның күзләрендәге очкыннарны! Инде очынды ул малай, инде башы күккә тия язды, шул бер-ике сәгатьтә ул үзенә аерым игътибар иткән абыйсына шулкадәр ияләнде, киткәндә күз яшьләре белән елады бала! Менә ничек кирәк бит һәр балага әти сүзе, әти игътибары, әтисе булмаган ятим балага чит абыйларның да бер сүзе алтынга тора! Кнәген районыннан 19 ятимне үз гаиләсенә җыйган Виталий Романцов чын мәгънәсендә Кеше! Шунсын да әйтеп узарга кирәк, Кнәген районында бер генә ташландык татар баласы юк. Социаль бүлек җитәкчесе Наталья Куренкова: «Андый балалар турында без әле ишетеп кенә өлгерәбез, ул арада инде аны я әби-бабасы, я башка туганнары шундук үз гаиләләренә тәрбиягә алалар», – дип исе китеп сөйләде. Ә менә Салган балалар йортында әниле-әтиле ятим татар балалары җитәрлек! Мин инде бер биш ел дәвамында бу йорт тормышы белән таныш, ел саен анда татар балалары арта бара гына. Соңгысында тагын бер малай өстәлгән. И ул баланың күзләрендәге моң, төпсез сагыш! Башкалар уйнаганда ул һаман читтә йөрде, бер уенга да катнашмады, ничек кенә сораштырып карасам да, ник шулай моңсу икәнен телдән әйтмәде. Башыннан сыйпап, үземә сыендырырга теләгәндә, таш кебек басып торды ул бала. Әле кайчан аның күңеле йомшарыр, әле кайчан ул бу колллективка ияләшер дә, кайчан эчеп-исереп йөргән, инде аңа кадәр дә берничә баласын бу приютка илтеп тапшырган балаларын исенә дә кертеп чыгармаган әнисен кичерә алыр?! Оныта алырмы, кичерә алырмы? Юктыр, шушы яшьтән хыянәт ачысы кичергән кечкенә йөрәге кичермәстер! Менә шундый балаларның тормышын әз генә булса да бизәргә, ничек кенә булса да ятимлекләрен беразга гына булса да оныттырырга тырыша Хәйрия бүлеге хезмәткәрләре. Соңгысында бу изге теләкне тормышка ашырырга милләттәшләребез Рамиль һәм Шамиль Еникеевлар булышты. Мәчеткә килгән җирләреннән Зөһрә ханым белән танышып, алар үзләре оештырган «Экстрим-ленд» паркында ял итергә чакырганнар. Менә шулай итеп, 40 бала бер көн буе табигатьтә ял иттеләр. Көн азагында аларны сугыш вакытында солдатларны ашаткан «полевая кухня»да әзерләнгән итле ботка белән дә сыйладылар. Анысы үзе бер маҗара булды, аны күргәннәре бармыни авыл балаларының, бу сиңа өстәл артында утырып ашау гына түгел, кинодагы солдат абыйлар кебек котелоктан ашаган кебек булды инде! Әйе, маҗаралар җитәрлек булды ул көнне. Балалар да, аларны озата килгән зурлар да бик канәгать калды бу ялдан. Хәйрия бүлегенә дә, Рамиль-Шамиль абыйларына да хор белән «рәхмәт» кычкырдылар да кайтыр юлга кузгалдылар. Балалар тормышында шундый матур мизгелләр күбрәк булса, күңелләре дә йомшаграк булыр аларның. Ә өлкәннәр колагына шуны әйтәсе килә: «Ятимнәрне багучы яисә балалы тол хатынга ярдәм итүче Җәннәттә пәйгамбәрләр белән бергә булыр», – диелгән Изге Корьәндә!

Рәзилә Ахмадуллина


Нравится

 

 Напечатать текущую страницу Напечатать текущую страницу

 Отправить статью другу Отправить статью другу

 
       

Региональная национально-культурная

автономия татар Нижегородской области

 

Общая информация об общине

Информация о РНКАТНО

Председатель и лидеры автономии

Официальные документы и заявления

Проведенные мероприятия

Контактная информация

 

  (c) При копировании материалов сайта, ссылка (гиперссылка) на www.nizgar.ru обязательна!